當公務員 都轉行做保險的年代
2017年的香港，身為Fresh Grads或大學畢業幾年的90後，除非你天賦異稟，可以係競爭激烈的私人市場呼風喚雨，否則無論你中環定觀塘返工都好，做銀行定做Marketing，基本上面臨一個 三無 局面：無飯開，無假放，無希望。
一個典型Scenario：HKU BBA畢業後，做廣告Agency，日日朝10晚10，人工就12k起跳，有返工無收工，放假仲要應酬班大佬同阿姐，工作濃度基本上係燃燒青春同生命。兩年後，人工依然徘徊係 14-15k左右。然後再睇到班「大佬」同「阿姐」，其實假如身心都頂到30歲，收入都不過20k多少少，但自己已經將健康同寶貴青春拱手相讓，比一間唔會當你係自己人唔Care你Well-being的公司，以及一大堆只係當你妹仔或工人一樣的所謂Accounts ( 即客戶)。
呢個時候，自不然就會考慮到不如考紀律部隊：散仔都月入22k起跳，每年跳Point而且工會爭取加人工，督察更加係人中之龍，大學一畢業就40k以上，30歲未到就隨時升到高級督察，月入6-7萬，呢個都差唔多係唔少投行VP水平。 一個人臨近三十歲，唔少都會面對殘酷現實：或許你永遠不會月入3萬，去考紀律部隊吧。
確實，係任何中學同學Gathering聚會，紀律部隊的舊同學通常都名列「人生勝利組」，身為「李Sir」「Madam Fung」，挾著政府公務員Pay Scale 升得好似火箭咁快的人工，成為同學之中人工又高，又有執法者光環的成功人士。
Also on SJ：廉署 VS 警隊邊個部門起薪點最高？
但最近，SJ一些朋友又發現一個新現象：FB newsfeed 開始出現本身做開紀律部隊或初級公務員的朋友，做左3-7年，似乎一路都做得順利，但竟然在FB 宣布，為左家人更好的生活質素以及自己更大的追求，同埋發現其實理財的重要性 … (下刪500字)，自己雖然不捨得一班兄弟，正式離開紀律部隊，而轉投 AIA / 保誠，成為「理財顧問」，震驚自己的700個FB 朋友。
無他的，雖然紀律部隊人工比好多私人市場的伏工高一大截，但在香港地呢個物欲橫流的社會，其實紀律部隊的人工一樣都追唔上樓價：做紀律部隊或初級公務員肯定可以買到樓，但亦基本上唔會好得去邊。今時今日，樓價400萬的樓，假如要在市區置業，一樣恐怕只得舊區的半舊樓，而且最多400呎左右，甚至可以話買斷公屋價錢都差唔得幾遠。
需知道：如今的香港超級豪宅貝沙灣 (呢度睇埋貝沙灣SJ House Review)，當年沙士2004年左右開賣，據說入場費低至600萬。呢度個Point係，隨住樓價自2013年起不停破頂，或在高位橫行，香港95%人的生活質素隨之下降，亦係不能避免的事。
但係，香港有5%人 (已經唔計一早買左樓發達的人)，卻可謂完全不受不停破頂的樓價影響，原因係佢哋收入完全跑贏大市，秒殺其他各行各業。
其中除左大家眾所周知的 ibanker以及月球人醫生律師以外，仲包括好多保險經紀 （現稱 理財顧問）。
SJ同大部分人一樣，對保險經紀的印象，仲停留係呢個畫面：
某某中學同學10年無聯絡，突然打電話比你噓寒問暖，然後就話約出來食Lunch。出到來，位都未坐暖，同學已經同你講自己而家係 AIA/保誠做，跟緊一條大Team，並拿出手機比你睇他們拿獎以及出席公司Annual Dinner同明星合照的相片，又炫耀自己已經係MDRT (百萬圓桌) 成員，係星級理財顧問，Serve好多大客。然後就開始問你有無買保險，家人有無買保險，買左危疾的話，就不如買埋人壽加儲蓄保，MPF又不如轉埋過來 ……… 當你好不容易食完餐飯走人，表明話自己要考慮下，佢即晚就Call你問你考慮成點。然後隔一排就問你可否Refer一些親戚朋友比佢，直接比電話佢自己Call就得 (PS 未得對方同意千萬唔好咁做)。
簡單而言，就係好L煩，神憎鬼厭，而且往往好似撈得唔係好掂。
但呢個基本上已經係過去。
2017呢個年頭，入行做保險而有志賺大錢的人，或已經做左一段時間而且已經上位的，基本上同尖沙咀的名店Sales一樣，眼光只落在大陸土豪客戶。唔知大家有無留意，近年連本地保險朋友都少左Call你煩你，其中一個原因就係前幾年開始大陸水浸，而且有一大班大陸官員同土豪，有大量現金要出逃匯到海外，其中第一站就係香港。當然，亦有唔少的資金目的地就係香港，總之離開中國大陸就掂。買香港巨額保險，就係一個出師有名的好方法。 對呢D土豪，買一年保費都要幾百萬的儲蓄保連投資，可謂輕而易舉。而香港保險經紀開一張咁既單，已經夠食幾年，所以對於「舊同學醫療保」呢種細單，真係膠都費時比。
而呢班有幸搭上呢班走資(或土豪)快車的經紀，月入20萬甚至更高並非天方夜譚。而做保險呢行，同年資又真係無咩大關係，只係睇你條數有幾大。條數夠大，30出頭已經可以月入幾十萬同埋請一大班下線做手下，人工仲高過香港特首。 做公務員跳Point，就算你讀完大學做AO，多年官運亨通而臨近退休滿頭白髮，Pay Scale已經跳到首長級，但你的收入都可能不如一個30出頭，穿著韓式修身西裝的保險經紀。 可想而知，個畫面對於轉行做保險的初級公務員係幾咁吸引？
以前就話公務員鐵飯碗，而且薪高糧準，其實而家都無錯，甚至相對私人市場的待遇，可謂比以前更好。
不過，當香港進入呢個連公務員都轉行賣保險的年代，呢種荒誕同蒼茫，有時真係令人對香港越來越陌生。
SJ結語
確實，香港又真係有一大班保險經紀食正呢條水，呢幾年肥過肥仔水，樓價再破頂對佢地都唔係太大影響。
有無保險業界人士分享下內幕？！
